I l'oma gnanca fàit an temp a nasse che is trovoma già recensì ansima
a vàire mojen dë stampa, tant an papé che an sla Ragnà. Motobin mersì
a tùit për la reclam :)
La wikipedia a l'é la pì gran enciclopedìa dël mond an sla Ragnà, e
costa-sì a l'é soa edission an piemontèis.
Coma tute j'edission dla wiki, 'dcò costa a l'é fàita dal travaj
d'académich, student e gent normal, tùit volontari ch'a travajo ansema
për feje servissi a la comun-a dij parlant ëd na lenga. 
Un travaj dont na part a peul esse soa!.
Minca person-a a l'ha un chèich sò setor ëd competensa, na materia
andova ch'a peul giuteje a la gent a amprende, an butand a
disposission ëd tuti soa conossensa. Conossensa ch'a peul ëvnì da na
specialisassion dë studi, n'esperiensa ëd travaj ò pura bele mach da
'n passatemp.
Tuti a peulo e a devo nen mach pijé, ma ëdcò travajé për
j'àutri. Donca pijomla da dësgagià. A l'é franch normal che un a sia
miraco nen vàire sigur ëd soa grafìa e gramàtica, ma sòn a l'é pro nen
un gran sagrin. Ël material a ven controlà, la grafìa quand a venta
rangela i la rangioma, ma j'informassion antant a resto e a-j servo a
tùit, dzortut ai cit.
Chi ch'a l'é neuv ambelessì a peul registresse coma utent e fesse soa
pàgina utent, për pijé l'andi a scrive e modifiché ëd test. Lë stranòm
che un as sern a peul esse an piemontèis, a-i é pa damanca 'd dovré ij
caràter dl'anglèis. Ën vardand la Piòla dël Paotass as peulo trovesse
ëd neuve ansima al proget, ëd pàgine d'agiut e dë spiegon técnich
dzora a coma ch'a sia pì belfé travajé.
Ël Pò a l'é un fium ch'a l'ha soe sorgiss, an vàire branch, al Pian
dël Re, an sël Viso, a n'autëssa ëd 2020 méter. As dëstend për na
longheur ëd 652 chilòmeter e a traversa për longh tuta la pian-a
padan-a, nen arlongh la linia mesan-a, ma për la pì part pì davzin a
j'Apenin che a j'Alp.
A-i é na distansa ëd 420 chilòmeter an linia d'aria an tra soe sorgiss
e soe 14 boche ch'a campo ant l'Adriàtich.
Ël balon a l'é në spòrt giugà con na bala elàstica ant un camp sensa
la rete ant ël mes.
A l'é giugà motobin, ëdcò a livel professionista, ant ël bass Piemont
e ant la rivera dël ponent dla Liguria.
As gieuga fassand-se 'l pols con dij bindej longh fin-a a 12 meter,
protegiù da 'n tòch ëd coram e na pessa 'd goma, per amortisé la bòta
dël balon an sla man e per andressé mej 'l tir.
Ël test a l'é disponìbil sota la Creative Commons
Attribution/Share-Alike License; as peulo giontesse condission
adissionaj. Varda Terms of Use për ij detaj.
