Nya'mweihi, Koridɨ mwaalyaihi,
Nabaai, nya'mweihi, nɨmɨ kwainyɨ sɨnnawɨ sarɨmɨnyawɨnna wawegaa' 
Gotɨyarɨne jalɨkurakya' yɨhɨzɨwaakadɨ yagaala sɨmunya yawɨrirɨkɨsajɨ 
mamakabyeinyɨ. Sarɨmɨ “ ‘Ai, a'mwe sai sɨmunyavɨ nemɨnyɨ 
newavɨla'delyɨ,’ nadɨpɨdɨka!” dena sara mihɨzɨwaakyeinyɨ.
Nya'mweihi, nabaai nɨmɨ a'mwe Kurya Tewaanyai kɨnɨnnakeraavɨ 
wɨdadɨnyabaaibɨ' mihɨzɨ yɨwɨneinyɨ. Aawa. Sɨmunya sɨnnawɨnya' 
kɨnɨnnakera kɨlaakejɨkɨya yawɨsa maremwaalɨkeraavɨ wɨdadɨnyabaaibɨ' 
yɨhɨthɨweinyɨ. Kɨraazɨtɨyarɨ wɨlamwaaihata bwaranyarabɨsaihɨrɨ 
yɨhɨthɨweinyɨ.
Sare'na nemɨnyɨna Kɨraazɨtɨyarɨne yadaanyainaavɨna a'mwei dara 
yawɨrana! “Sahwara Kɨraazɨtɨyare wɨdaayadɨvɨsare. Yɨ Gotɨyare yagaala 
kuku'nya, nebulya' yoimavajalɨkurakya maremwaaidɨvɨ' wɨjɨwaakadɨvɨsare.”
Nɨmɨ nebwina dara wɨ'nɨwa. Koridɨ mwaalyara lɨmwadɨvɨsaraavɨ 
gɨrɨkita'nanyabwi warɨkesɨ. Yɨ nabaai gɨrɨkita'nanya sa' nabinyabulyɨ. 
Yɨ sasare sabwi ajɨmya yuyangɨyara mu'nyadɨvɨsara “Aala!” dadɨvɨ' 
yadɨvɨtabwi mɨ'. Sa' daresɨ. A'mwe pwai sarɨmɨjɨyai ganɨmaangere a'mwe' 
maarɨna.
Sarɨmɨjɨya pwai kwai sarɨmɨjɨya pwarɨ wɨja'na yagaalya' kɨnɨnnakei 
Gotɨyare tewaanyara yawɨbwarya'neraavɨ pari'ma'dei dɨngaka! A'mwe 
Gotɨyarɨna yɨda'maraangera mamwaalyɨgasara mu'nyadɨvɨsaraayabanna 
kotɨya' yaawadelyɨ. Sai sasare sabwina wagɨla muvwa'nyadei dɨngaka!
Dahaa' pɨkarɨyɨkwiavɨ sarɨmɨ yɨda'mwa'daata a'mweraavɨre mwaalyabwina 
nɨmɨ dara ja'nayɨhɨthɨde'nanyɨ. A'mwei a'mwevɨ kwala mamaarya'ne' sa' 
yaasɨwa' mwaalyabwi tewaanyasɨra.
Kwaasɨgotɨyaraavɨna mubɨthɨka tamira'dɨvɨta mɨwɨta pimagɨnyangɨna, 
nyɨda'mwa'daasangɨna, ja'nawɨdɨma! “Nemɨ yuyaina sɨmunya' 
kɨnɨnnakeinera,” yawɨ'daanyɨreva. Yɨ sɨmunyabwina pihadɨkebwi yada yaya 
munyaba makinyaburɨ neyɨdɨkaa'desɨ. Kɨrɨ' nabaai kale neyabwina 
kuryaraavɨ yɨvaimwadesɨ.
Sareinyɨ Polɨnyɨ Kɨraazɨtɨyarɨna aane pɨrɨ' kɨrɨ' wɨla nyɨpwɨyadeinyɨ 
daaka! Nɨmɨ Apozelɨyainyɨ midaaka! Jizaazarɨ nemɨre Naangerɨ tɨnna mena 
wanganeneinyɨ midaaka! Naangerɨ, nɨmɨ wawɨnya yevɨdaa'nyɨ yɨ sarɨmɨ 
gamɨreihi midaaka! Sare'na a'mwera nɨmɨre sɨmunyavɨ yɨde' 
madahalanyɨlɨmwabɨneinyɨ.
Sare' darevɨnyɨ. Nya'mweihi, yagaala dangɨ sarɨmɨ navɨka ya'na nɨmɨ 
sɨmunyavɨ “Aala!” dɨwa. Yuya nemɨre aataravaavɨ Ne Mozɨzai Kwaaka 
Yɨzɨpɨdaasɨ makabadaa'nyɨ sahwara yɨraaya' maremwaalakevɨ kwaakewɨ 
wɨla'dɨvɨ' kaanya yamaryesare. Yadɨvɨ' yuyara yune sɨvɨlyajɨna 
saalaalyavɨ tewaanna wɨlaawesare.
Nɨmɨ kwainyɨ Kɨraazɨtɨyarɨ yawɨrangadɨ ke'ba'nanya sahwarɨ 
wɨmɨdɨdɨnyainyɨ. Sasarebaaibɨ' nɨmɨnyɨ nyawɨrangadɨvɨ' ke'ba'nanya 
sahwainyɨ dɨnyɨmɨdɨnyɨla!
Nya'mweihi, nyɨda'mwa'daasa'na Kurya Tewaanyai yanga nejaavade sanna 
sarɨmɨ navɨka ya'na sɨmunyavɨ nɨmɨ “Aala!” dɨwa.
Nɨmɨ Gotɨyare yagaalya' a'mweraavɨre yagaala dala pɨnɨnna 
pɨnɨnnanyangɨjɨ yɨ ejelɨyaraavɨre yagaala kɨnɨngɨjɨ myawɨryadɨnyangɨna 
a'mweraavɨ wɨdɨwɨja' kɨrɨ' sahwaraavɨna tewaanya manyɨvu'nyaja' yɨ nɨmɨ 
sareinyɨ beloya gɨrɨngɨ'devaaibɨsainyɨ. Gwarewa' jaka yaasɨwa'na 
yɨnnɨgodevaaibɨ' aaya kaavɨlya maayainyɨ waryaanyainyɨ 
wɨdɨdevaaibɨsainyɨ.
Pwaraavɨna tewaanya yɨhɨvu'nyabwi yuyagaa' kuna dɨragɨnna dɨmɨdɨnyɨla! 
Nabaai sarɨmɨ Kurya Tewaanyare sɨhumalenna maarya'na “Dɨragɨnna 
yawɨramaraana!” dadɨvɨ' dɨmwaalyɨla! Nabaai sare kɨrɨ' yanga naange' 
“Gotɨyarɨ wɨ'nawaajɨ pwaraavɨ wɨjɨwaakya'neina yɨma'naana!” dɨragɨnna 
dadɨvɨ' dɨmwaalyɨla!
Nya'mweihi, yagaala tewaanya' yɨhɨzɨwaake' sarɨmɨre sɨmunya ayɨna 
maradɨhaa'bwata yɨhima! Yagaala tewaanya sa' sarɨmɨ mena maaresasɨ. Yɨ 
dazavɨ dɨragɨnna daa'dɨvɨsasɨ.
