E Pol. Kristus Yesus na e qariŋbej deqa e aqa anjam marsim laqnum. 
Qotei aqa segi areqalo na e merbej, “Ni ijo Aŋgro Yesus aqa anjam 
marsim laqne.” Onaqa e Qotei aqa areqalo di dauryosim agi e Yesus aqa 
anjam marsim laqnum. O was qu, aqo gago was Sostenes wo anjam endi 
neŋgreŋyosim niŋgi qa qariŋyonum.
O was qu, e nami niŋgi qa bosim Qotei aqa anjam merŋgoqnem bati deqa e 
anjam kokba powo tamo naŋgi mareqnub qaji di niŋgi merŋgosai.
O was qu, e nuŋgo ambleq di soqnem bati deqa niŋgi Kristus aqa kumbra 
geregere qalieosaisoqneb deqa niŋgi aŋgro mom bul soqneb. Deqa anjam e 
na tamo uŋgasari Qotei aqa Mondor dauryeqnub qaji naŋgi minjreqnum di 
niŋgi olo merŋgwa keresai. Anjam e na tamo uŋgasari naŋgo areqalo namij 
dauryeqnub qaji naŋgi minjreqnum di segi niŋgi merŋgoqnem.
O was qu, aqo Apolos wo Kristus aqa wau tamo. Iga Qotei aqa uli anjam 
taqatejunum. Niŋgi iga qa degsib are qaliye.
O was qu, e anjam bei endegsi quem. Nuŋgo ambleq di tamo bei a sambala 
kumbra yeqnu. Aqa sambala kumbra di tulaŋ ugedamu. Tamo naŋgi Qotei 
qaliesai qaji naŋgi sambala kumbra deqaji yosaieqnub. Aqa sambala 
kumbra agiende. A na aqa abu aqa ŋauqali olo oqnsiq ombla sambalaeqnub.
Nuŋgo kumbra uge bei agiende. Nuŋgo ambleq di tamo qudei naŋgi Kristen 
was bei qa anjam soqnim a oqnsib anjam pegiyo talq osi giloqnsib anjam 
pegiyo tamo naŋgi Qotei qaliesai qaji naŋgo ulatamuq di tigelteqnub. 
Naŋgi a oqnsib Qotei aqa tamo uŋgasari naŋgo ulatamuq di 
tigeltosaieqnub. Naŋgo kumbra uge deqa naŋgi jemainjrosaieqnu.
Ariya was qu, anjam qudei niŋgi nami neŋgreŋyosib e qa qariŋyeb qaji 
deqa e kamba olo niŋgi merŋgwai. Anjam bei niŋgi neŋgreŋyeb qaji agi 
uŋa oqajqa anjam. Deqa e kamba niŋgi endegsi merŋgwai. Tamo naŋgi uŋa 
oqasai di kumbra bole.
Ariya e na sulum atrainjro qaji iŋgi iŋgi uyqajqa kumbra qa niŋgi 
merŋgwai. Tamo qudei naŋgi endegsib mareqnub, “Iga kalil powo ti unum.” 
Di naŋgi bole mareqnub. Ariya naŋgo powo dena naŋgi olo tulaŋ diqoqnsib 
naŋgo segi ñam soqtoqnsib laqnub. Ariya iga qalaqalaiyo kumbra dauryqom 
dena iga Kristen tamo uŋgasari naŋgo areqalo siŋgilatetnjroqnqom.
Niŋgi ijo kumbra uniye. E kumbra kie yqa are sqas e yqai. Qotei na e 
qariŋbej deqa e aqa anjam marsim laqnum. E ijo segi ŋamdamu na gago 
Tamo Koba Yesus unem. E nuŋgo ambleq di Tamo Koba Yesus aqa wau ojem 
dena niŋgi are bulyosib Kristen tamo branteb. Niŋgi ijo kumbra deqa 
qaliesai kio?
O was qu, niŋgi ijo anjam endeqa geregere poiŋgem. Nami Moses aqa bati 
qa gago moma kalil naŋgi wadau sawaq di sonabqa Qotei a laŋbi na naŋgi 
gam osornjroqnej. Bati di naŋgi Yuwal Lent di gentosib mandam boleq 
aisib walwelosib gileb.
Niŋgi ijo kumbra dauryosib walweloqniye. Agi e segi Kristus aqa kumbra 
dauryoqnsim walweleqnum dego kere.
Ariya was qu, Qotei aqa Mondor a na iga siŋgila segi segi egeqnaqa iga 
wau ojeqnum. E deqa niŋgi merŋgit quiye.
Kumbra tulaŋ boledamu di agi qalaqalaiyo kumbra. E meŋ bulyosiy qure 
utru segi segi naŋgo anjam kio laŋ aŋgro naŋgo anjam kio maroqnqai 
ariya e qalaqalaiyo kumbra dauryqasai di ijo anjam maro di bolesai. Ijo 
anjam maro di laŋa noul bulosim qatroŋkobaqas. Osim gruma bul laŋa 
anjam atqas.
Deqa was qu, niŋgi gaigai qalaqalaiyo kumbra dauryosib soqniye. Sosib 
wau kalil Qotei aqa Mondor na niŋgi eŋgeqnu qaji di dego yqajqa tulaŋ 
siŋgilaoqniye. Wau boledamu bei agiende. Qotei aqa Mondor na niŋgi 
siŋgila eŋgimqa niŋgi Qotei aqa medabu oqnsib anjam palontoqniye. Osib 
wau di yqajqa tulaŋ siŋgilaoqniye.
Ariya was qu, Yesus aqa anjam bole e nami palontosim niŋgi merŋgoqnem 
qaji di bini e olo pulutsiy niŋgi merŋgwai. Anjam di niŋgi nami qusib 
dauryeb. Deqa e qalieonum, bini niŋgi anjam di siŋgila na ojsib 
tigelejunub.
