Got wunat wandéka wuné Pol Krais Jisasna kundi kure yaakwa du wa 
téwutékwa. Téte gunat wawutékwa nyéngaamba. Sostenes waak Krais Jisasna 
jémbaamba wa yaalandén. Yaale wunale téte ani nyéngaa sékét 
viyaatakatékwa gunéké.
Guné Krais Jisasna jémbaamba yaale wuna aanyé waayéka nyangengu pulak 
tékwa du dakwa, ma véku. Néman Duna yé male kavérékngunénngé 
vékulakate, wa wuné gunat Got paakundén kundi waké yaae, wa apakundiké 
vékusékngwa du pulak yamba wawutékwe.
Wuna aanyé waayéka nyangengu pulak tékwa du dakwa, Gotna Yaamambi 
kuretékwa duwat néma kundi wawutékwa pulak gunat waak waké mawulé 
yawutén. Yate gunat wunga yamba wawutékwe wa. Guné Kraisna jémbaamba 
baasnyé ye yaale nyambalé pulak wa yaténgunén. Yaténgunénga wuné Gotna 
Yaamambi kuretékapuk yakwa du dakwat wawutékwa pulak gunat wawutén.
Nanéké anga ma wangunék, “De Kraisna kundi vékute déku jémbaa yékunmba 
yandakwa. Krais det wandéka Got talimba paakundén kundi wa bulaa nanat 
wandakwa. De Kraisna jémbaa yakwa du wa. De papukundi wakapuk yate wa 
yéku kundi nanat wandakwa. Yi wan wanana wa.” Wunga wangunénngé mawulé 
yawutékwa.
Guné kapérandi yapaté yangunénga wandaka vékuwutén. Guna du nak déku 
aapana taakwa kéraandén. Wani muséké Gotna kundi vékukapuk yakwa du 
dakwa anga wandakwa, “Wani kapérandi musé katik yaké nané.” Wunga 
wandaka guna du nak wani kapérandi musé wa yandén.
Guna du ras Krais Jisasna jémbaamba yaalan nak duwale waarute de Gotna 
kundi vékukapuk yate kot vékukwa duké yéndakwa, wani néma du deku kundi 
vékute deku jémbaaké wandénngé. Gotna kundi vékukapuk yakwa duké 
yéndakwanngé, kamuké daré nékéti yamba yandakwe? Kamuké daré Gotna duké 
yamba yéndakwe, de deku jémbaaké wandarénngé?
Nyéngaamba viyaatakangunén kundi bulaa kaatakawutékwa. Du, taakwa 
kéraakapuk ye kwawindu yaréndaran, wan yékun wa. Wunga vékulakate wa 
wawutékwa.
Guné papungorké kwayéndarén kwaamiké waatakungunén kundiké bulaa 
kaatakawutékwa.
Du ras wuna kundiké kuk kwayéndakwa. Kuk kwayéndakwanngé ani kundi ma 
vékungunék. Wuné Krais Jisasna kundi kure yaakwa du wa. Nak duna kundi 
vékukapuk yate mawulé yawutékwa jémbaa wa yawutékwa. Yawutu nak du wuna 
jémbaaké wunat katik waaruké dé. Wuné nana Néman Du Jisas wa véwutén. 
Wuné déku jémbaa yawutéka guné déku jémbaamba wa yaalangunén. Yi wan 
wanana wa.
Guné Krais Jisasna jémbaamba yaale wuna aanyé waayéka nyangengu pulak 
tékwa du dakwa, guné kurkale ma véku. Du dakwa ras deku sépé deku 
mawuléké waak apamama yakapuk yandaka Got det kuk kwayéndénngé, 
yékunmba vékusékngunénngé mawulé yate, wa gunat wawutékwa.
Wuné Krais Jisas yan pulak wa yawutékwa. Guné wunat véte wuné yakwa 
pulak ma yangunék.
Krais Jisasna jémbaamba yaalan du dakwa, bulaa kundi ras wakawutékwa, 
Gotna Yaamambi tiyaandékwa mayé apaké. Guné wani mayé apaké yékunmba 
vékusékngunénngé wa mawulé yawutékwa.
Yénga pulak dé? Gotna Yaamambi nanat mayé apa tiyaandu nané ani 
képmaamba tékwa du bulndakwa kundi akwi vékukapuk yate, wani kundimba 
wate, Gotna kundi kure gaayakwa dunyanna kundimba waak nané wo? Wunga 
wate, nak du dakwaké néma mawulé yakapuk yamunaae, wa baka kundiké wa 
bulkanangwa. Miyé kurkale vaakérakapuk yandakwa pulak, wa baka kundiké 
male wa bulkanangwa.
Gunat anga wawutékwa. Guné apamama yate du dakwaké, Gorké waak néma 
mawulé ma yangunék. Nak kundi waak wawutékwa. Guné deké néma mawulé 
yate Gotna Yaamambi tiyaakwa késpulak nakpulak mayé apa kéraamuké 
mawulé ma yangunék. Gotna yémba kundi kwayénanénngé wa Gotna Yaamambi 
mayé apa nak tiyaandékwa. Wani mayé apa kéraamuké néma mawulé ma 
yangunék.
Krais Jisasna jémbaamba yaale wuna aanyé waayéka nyangengu pulak tékwa 
du dakwa, guné ma véku. Gunat Krais Jisaské wawutén kundiké 
vékulaka-ngunénngé wa mawulé yawutékwa. Guné wani kundi wa vékungunén. 
Vékungunénga guna mawulé apamama yate wa yékunmba téndékwa.
